Il-ħaddiema tad-Dipartiment tax-Xogħlijiet Pubbliċi se jibdew jagħmlu użu minn inġenji ġodda bil-għan li l-ħidma tad-dipartiment issir aktar sostenibbli, sigura u effiċjenti.

Fi stqarrija ġie spjegat li b’investiment li jiżboq in-nofs miljun ewro l-inġenji l-ġodda se jieħdu post dawk aktar antiki u li kienu qed jagħtu diffikultajiet waqt ix-xogħlijiet.

Fost oħrajn id-dipartiment investa f’ħames trakkijiet ġodda ta’ 16-il tunnellata ‘l wieħed li se jintużaw għall-ġarr ta’ materjal tal-kostruzzjoni u merkanzija oħra, erba’ karrijiet ta’ tliet tunnellati u nofs biex jintużaw għall-ġarr ta’ inġenji żgħar u żewġ rombli ta’ żewġ tunnellati li se jintużaw għal xogħol ta’ manutenzjoni ta’ toroq.

Fi żjara fil-garaxx tal-Gvern f’Kordin, is-Segretarju Parlamentari għax-Xogħlijiet Pubbliċi Omar Farrugia stqarr illi dan l-investiment kien bżonnjuż ferm u se jiżgura iktar effiċjenza fit-tlestija tal-proġetti.

Intant ġie spjegat li sar investiment ukoll f’żewġ mini-excavators ta’ erba’ tunnellati li se jintużaw għal xogħol ta’ tħaffir u li mistennija jaslu f’pajjiżna f’Mejju li ġej.