Ħaddiema mid-Dipartiment tax-Xogħlijiet Pubbliċi qed isegwu proċess ta’ manutenzjoni u tindif ta’ ġibjuni madwar Malta. Dan ix-xogħol isir matul ix-xuhur tas-sajf biex il-ġibjuni jkunu lesti biex jiġbru l-ilmijiet tax-xita fix-xitwa. Barra minn hekk, dawn ix-xogħlijiet jgħinu biex jitnaqqsu l-għarar filwaqt li jkunu ta’ għajnuna għal-bdiewa tal-inħawi. Matul żjara li saret fil-ġibjun ta’ San Klement fiż-Żejtun, il-Ministru Chris Bonett u s-Segretarju Parlamentari Omar Farrugia tkellmu dwar l-importanza ta’ infrastruttura sostenibbli u l-użu responsabbli tal-ilma. Il-ġibjun, li jżomm madwar 2,500 metru kubu ta’ ilma, qed jitnaddef mill-ħamrija u materjal ieħor li jinġabar, u l-ħitan tal-ġibjun qed issirilhom manutenzjoni fuqhom.